全世界早已經進入「體驗」年代，幾年前無論飲食、娛樂，除咗物品同服務本身呈現出嚟都要有好嘅體驗，良好嘅售前售後體驗都係不可或缺。仲記唔記得「海底撈」？喺你到門口等位嗰陣，已經開始提供個好嘅體驗畀你，你話美甲關唔關食嘢事？唔緊要，最緊要個客等位嗰陣唔悶，自然等位就唔會燥，入到去食嘢都唔會令服務嘅員工難受。
「出行體驗」呢個詞彙，呢幾年都見得唔少，唔好以為搭車唔洗有「體驗」，巴士地鐵要有 Wi-Fi、到站時間預報、預先出行規劃、替代路線方案等等，呢啲同簡簡單單「搭車」呢個服務需要，係無直接關係，但喺呢個世代，係需要服務供應者提供。
提升出行體驗，唔止係服務提供者同乘客互動之下嘅結果，當中或多或少都會有政府嘅介入。唔講太遠，2017年做《香港智慧城市藍圖》中已經有「智慧出行」，2019年《香港智慧出行路線圖》入面有寫埋要搞600架「專營的士」，但業內人士以人手不足為由反對兼司法覆核，更指出「推行高檔次及高消費的專營的士建議不合時宜及不切實際」，2020年政府宣布放棄，結果等到2023年先至再話搞車隊制度「闖關」。
提升出行體驗係大趨勢，但唔係乘客唔想，唔係政府唔做，只係因為所謂嘅「的士業內人士」阻礙先至搞唔到。重點嚟啦，而家香港的士有無畀到個良好嘅「出行體驗」？已經唔講長嘅短嘅過海嘅都唔去呢個服務根本問題，一個先進嘅亞洲城市，到而家都仲係得少數自己組成嘅車隊有 App 做預約、收信用卡等多元化付款方式，嚴重影響所謂嘅「出行體驗」。
講得衰啲，如果仲麻煩過搭巴士地鐵，點解仲要搭的士？無客又自然無人租的士揸，自然牌價跌，好正常啦？唔好以為 set 定個雞棚話唔加價貴保險所以無人入行，而係全世界做緊洗牌，再話行業老化無人做，遲早引入廣東人才嚟揸的士，到時可以好好退休啦。